睇到呢個題目，相信大家都好有興趣呢，可惜我有少少呃你入嚟，因為各大媒體已經宣佈咗，Fair Work Commission喺6月2日公布，建議最低工資加幅達8.6% ，而Award Rate將會調整達到5.75% ！而呢個調整將會喺財政年度7月1號開始，意味着無論係零售、服務業定係製造業等，成本將會上升至少5.75 ％。報道就話呢大概會有超過二兩成半工人受惠，咁究竟最低工資嘅增長，係點樣去斷定嘅呢？ 

呢個加幅係自2019年以來，最大升幅，佢係透過一籃子嘅因素去作出判斷，例如整體嘅物價指數、通貨膨脹、甚至對銀行帶嚟嘅壓力、現時就業指數等等都作為考慮因素。因為呢個加幅係會涉及超過120個modern award，即係話正在領取Award Rate最低工資嘅人士，佢嘅薪酬將會由每星期 $812.6 或每小時 $21.38 上調至每星期 $882.8 或每小時 $23.23。（TAPS payroll.com.Au） 

咁最低工資相對起消費物價指數又係一個點樣嘅對比呢？基礎上5.75%都依然係跑輸大市，因為過去幾個月嘅通脹雖然已經叫做緩和，不過依然高達6.3%，即係話就算人工加咗，物價嘅升幅比你嘅人工升幅高咗大約0.55 ％，簡單來講，如果你嘅薪金係一早已經超過最低工資，而公司係冇將你嘅薪酬調整嘅話，你變相係俾人扣減咗人工，因為你嘅收入對比你嘅開支係成反比，不進則退。有調查亦都指出，如果你留喺一間公司繼續工作，你嘅加薪幅度平均大約只有2.4%左右，然而你跳槽去另一間嘅話，就有機會高達15%至30%不等。 

你可能立即覺得有着數，係咪要即刻上去Seek或者LinkedIn搵吓工先？你當然可以咁樣選擇啦！同時間我要提醒你，轉工亦都有一定嘅風險，例如公司嘅文化、工作性質等等，你仲需要經過六個月嘅試用期，呢啲都係一啲不穩定因素，除非你對份新工十拿九穩，又或者老細係你個friend，否則轉嘅時候我估你點都會計過度過，唔會貿貿然就放棄而家一份穩定嘅工作啩。

私人企業會睇住政府嘅加幅做人，而新政府上場對公務員嘅加薪幅度係三年總加薪10.5%，而今年嘅加薪係3%。咁即係點呢？今年究竟加幾多人工呢？好難講。政府帶頭加3%，大部份企業個加薪幅度都會跟，所以大概係3%到4.5%之間，如果你公司肯加你5%嘅人工，呢間公司都叫做待你不薄。

 咁講嘅話，喺公司同老細要求加人工嘅議價空間大概有幾多呢？如果你嘅人工只係啱啱掂到Award Rate嘅話，恭喜晒，你老細冇得揀一定要加你5.75%，同時間，你嘅工資其實係處於非常基礎嘅水平。一般來講，如果你嘅時薪係已經高過最低工資嘅話，公司係有權唔加人工俾你嘅。喺澳洲一般來講，都會按着CPI同你作出相應調整，好多時候都會喺大約三、四月已經發生，當然每間公司都唔同，唔可以一概而論。照計CPI係唔應該因為你工作嘅表現而有所不同嘅，好多澳洲公司都會有一個劃一嘅加薪幅度，因為呢個與表現無關，係同通脹掛勾。

剛才嘅數據重有澳洲統計局加持，三月份嘅統計數字顯示，人工增幅大約係平均3.8% ，冇錯，仍然係跑輸通脹。

 睇完一大堆數目字，希望能夠比到你些少眉目，今年你大概有機會加到幾多人工。

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

支持我們：https://www.ls1.points-media.com/supports/

The post 【人事世界】今年人工加幾多？ － Sydney HR 的日與夜 appeared first on 棱角媒體.

近幾年因為社會因素，大量香港人選擇移居外地。美加澳紐台灣英國等地，都係香港人熱門的移民國家。要適應新生活當然不容易，除了衣食住行需要重新適應以外，心理上嘅調節亦都非常重要。近期接觸不少嘅案例，都係喺移民適應裏便出現咗矛盾，需要協助甚至輔導。當中不乏一些在香港工作非常有成就的朋友，來到這裏，重新開始嘅時候，面對極大挑戰。

接觸嘅案例，幾乎清一色都係未能夠喺度搵得返以前工作嘅職位，佢哋發現無論係職級、工作環境甚至薪資都同香港相距甚大，一時之間未能接受；有朋友因為一直找不到工作，心裏愁煩，仍然喺香港嘅朋友卻有點兒不知死活，不斷發給他一些招聘廣告，告訴他在香港仍有機會。朋友來澳洲可以話去破釜沈舟，香港嗰班朋友「好心」嘅建議，就好似夾硬將佢隻船補番個窿一樣，搞到佢不知所措，喺度量緊地，睇見香港有機會心思思，老婆仔女全部都喺澳洲，手掌又係肉手背又係肉，甚為艱難。亦都有朋友喺面試嘅時候，面試官係一個只係得幾年貨仔經驗嘅?仔，望住個細路，明知佢喺度語無倫次，又唔可以當面斥責，尷尬得嚟，又覺得做乜自己攪到今日咁嘅田地；更加common嘅係，去見工嘅時候俾人望住份履歷，話你Over qualify請你唔起，又難怪嘅，請你嗰個可能拍馬都追唔上你嘅經驗，見到你份履歷對佢來講可能係一個威脅。面對呢啲問題，點樣解決，我另外有文章係曾經提過嘅，喺度不再詳述。

作為過來人，我當然明白佢哋嘅感受。

上述嘅事件全部都發生過喺我身上。當初嚟到都係用咗一年嘅時間先搵到份工，期間都返咗香港起碼兩次，都係因為接咗香港一啲freelance嘅工作，希望叫做有啲世藝，唔使日日量地。亦都試過見工嘅時候兩位面試我嘅女士拎咗份履歷直頭同我講，「我都應該唔使同你點介紹公司㗎啦，你以前喺香港都係做嗰間」，跟住睇到佢問嗰啲問題完全唔make sense，答嘅時候已經好有技巧，最後當睇見佢哋皺眉頭，都知道死硬。到最後終於搵到份全職工作，份糧大概只係得香港嘅三分二左右，已經叫做好好彩，由低再做返上去，當然心裏不是味兒，只不過都唯有頂硬上，到後來種種緣故，轉行又轉職，最後又係返返去做返老本行，好彩累積咗少少嘅經驗，先至叫做而家好少少，起碼都叫做穩定下來，過程猶如坐緊過山車，此起彼伏，都真係幾難捱。

一講到呢個話題，好多人會叫你不忘初心，諗返點解要移民，都係為咗仔女有更加好嘅前途，同埋唔需要生活喺共產黨嘅陰霾之下；世界很現實的，當你拍晒心口執晒嘢走人，開頭嗰半年忙於安定落嚟冇諗咁多，定落嚟嘅時候開始發現世界不似預期，理想與現實有一段距離嘅時候，你就會開始問自己點解要Make呢個decision，尤其是都睇到香港啲朋友係香港生活依然，通關之後可以去日本去台灣東南亞⋯⋯自己就日日望住四埲牆嘅時候，便開始懷疑人生，也的確不容易。

作為人事專業，雖然微小，也都儘力而為，努力協助新移民盡快適應新生活，找到工作，落地生根。在澳洲有很多不同嘅港人組織，若果大家希望得到更加多資訊，或者需要喺人事上邊作出查詢嘅話，歡迎大家私訊，我會盡量回答。

要頂住的確唔容易，大家唔需要太過愁，因為身邊係有好多願意幫助你哋嘅人，最緊要出聲。

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

支持我們：https://www.ls1.points-media.com/supports/

The post 【人事世界】新生活適應注意 － Sydney HR 的日與夜 appeared first on 棱角媒體.

當香港喺度不斷嗌晒救命，話好多基層職位係欠缺勞工，係咁話要引入外勞去填補空缺。如果我哋做多少少功課，不難發現，唔止係香港，全球已發展國家大部份都係面對緊同樣嘅情況，就係一啲比較基層嘅職位，長期出現勞工短缺嘅真空情況。請人永遠都搵唔到，請到又做唔得耐，職場究竟發生咗乜嘢嘅狀況導致有呢一個現象呢？

就過去嘅觀察，再加上唔同嘅人事網站所釋出嘅訊息同埋調查，我哋可以將佢分作幾個範疇去討論。

首先係新生代對工作要求嘅基本改變，例如佢哋好多都傾向要在家工作（ Work from Home ），要求工作有更多嘅彈性，例如工作時間唔需要限定，一啲勞動性嘅工作，佢哋亦都唔會放响首選。喺呢個情況之下，一啲嘅工種出現嚴重嘅斷層，甚至逐漸式微，因為技術無法承傳。

另外，隨着科技嘅日新月異，有啲嘅工作慢慢步入夕陽，例如製造業、運輸業等隨着自動化，好可能技工及司機會逐漸被取代，新一代睇唔到佢哋入行會有乜嘢嘅前景，所以寧願選擇唔好進入嗰個行業；一啲文職嘅工作，亦都面對同樣問題，就係佢哋有機會逐步比AI所取代。

亦因為新一代嘅教育水平越來越高，願意做基層工作嘅意願越低。你唔難發現好多嘅零售業，聘請嘅都係一啲讀緊高中或者大學嘅學生，畢咗業之後大部份都會辭職投向自己嘅專業，令到行業青黃不接。剩返落嚟嘅就只有一啲老行尊，又或者只係要求做兼職嘅大媽們。亦都因為咁樣嘅緣故，你唔難發現，店員就大把，店長卻欠奉，因為根本冇人有咁嘅資歷同埋資格去擔當店長呢一個嘅職位。

即食文化亦都嚴重影響新一代嘅就業情況，以前嗰種慢慢捱上嚟嘅歌仔已經唔使再唱，新生代希望能夠以最短嘅時間將利益最大化，然後就再轉戰另一個範疇，有機會導致周身刀冇張利，所有範疇所認識嘅都只係表面及皮毛，隨着老一輩慢慢嘅退出，一啲古老嘅技術或者智慧就會從此失傳。

咁企業應該採取啲咩策略去處理呢個問題呢？以現時嘅就業環境（澳洲而言），能夠聘請到合適嘅人才的確充滿挑戰。就住上述嘅理由，應徵者好多都獅子開大口，然而企業嘅成本係需要考慮的，係俾咁多錢請你，根本無辦法可以維持運作，有時候唔係孤寒，係「俾唔起」。你可能話冇嘢啊，孤寒就孤寒啦。你估得你一個識咁諗咩，當個個都希望自己人工多一啲嘅時候，正所謂樹大斬埋係有柴㗎，你識咁樣同老細坳，其他人唔識咩。到最後咪又係
Loop返去同一個問題囉，負擔唔起。

現時整個經濟結構係落入咗一個惡性循環，通脹加劇，人工追唔上，所以大家都會要求更高嘅薪酬待遇，同時間企業亦都因為成本上漲未能消化，導致出現現時所面對緊嘅結構性問題。

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

支持我們：https://www.ls1.points-media.com/supports/

The post 【人事世界】新生代職業結構的基本更改 － Sydney HR 的日與夜 appeared first on 棱角媒體.