如果大家仲記得嘅話，以前有個美國嘅真人騷叫做《飛黃騰達》（the apprentice），由當時仍未係美國總統嘅「財大氣粗」富商Donald Trump主持。當中最經典嘅對白就當然係「you’re fired！」，喺現實嘅澳洲社會，炒人，係咪真係咁容易呢？

澳洲係一個我哋叫做「保護勞工社會」就係人都知，即係工人階級所享有嘅保障比僱主大。例如根據法例，如果員工係仍然未過試用期嘅，其實終止僱傭合約係唔需要提供任何理由。咁當然，好多僱主為咗保住自己嘅名聲，都會願意鬆手啲，賠返一個禮拜人工，然後送佢走。萬一佢過咗試用期，要請佢走就會好閉翳。除非大是大非涉及刑事（例如犯法、嚴重失德），若然要同佢say拜拜，過程都會幾漫長。

繼續傾落去之前，我哋首先要了解兩個概念：一個叫做解僱（Fired），另外一個叫做裁員（redundancy）。呢兩樣嘢嘅處理手法係完全不一樣嘅，處理不當嘅話就會負上法律風險。

先講解僱：若然你過咗六個月試用期後，僱主係唔能夠隨便解僱你。一般來講需要先經過一輪嘅performance management，簡單來講就係俾機會你展示俾僱主睇你係能夠達到佢嘅要求。一般來講會俾兩至四個禮拜，然後做一次檢討，若然仍未達標，基礎上會再俾多兩至四個禮拜嘅機會。當然每次也會有文件及會議紀錄佐證。假設到最後你都仍然搞唔掂嘅話，公司就唯有出解僱信，按勞工法例給予代通知金，終結僱傭關係。

跟住到裁員：裁員需要嘅時間更加漫長，因為公司需要先進行改組，並且向受影響僱員先宣布將會有職位需要刪減，並且提出足夠理據支持該改造方案。受影響嘅部門，第一輪會係自願離職方案，若然已經夠數嘅話，公司係冇需要進行第二輪嘅裁員；若然需要進行下一輪嘅話，要先對受影響員工進行審核，以公平公正嘅方式選取被裁嘅員工，並且與他們舉行個人會議，解釋選擇他們的原因，並且嘗試提供其他方案（例如將佢調到其他部門），及告訴他們賠償方案；另外公司亦需要表示並非蓄意將該名員工裁走。一般同事會給予數天時間考慮或向公司提供意見又或者決定，公司亦會喺信上邊所寫嘅日子作出最後嘅裁決。大家見到呢個都係一個頗為長嘅過程，所以好多時候只會係喺一啲有好多部門嘅大公司先至會採用這個方法。如果係細公司（得幾兜友）嘅話，好多時候都直接同佢講冇辦法可以繼續聘請，因為已經營運不到下去。請留意，根據法例，若然係裁員嘅話，喺未來六個月公司係唔可以增聘同樣位置嘅員工，否則便屬違法。

有關裁員嘅相關法例，可以到以下網址參考：

https://www.fairwork.gov.au/ending-employment/redundancy

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

支持我們：https://www.ls1.points-media.com/supports/

The post 【人事世界】－炒人果真如此容易？ appeared first on 棱角媒體.

澳洲着重多元文化，喺職場裏便尤其能夠顯示出來。除非企業有非常獨特嘅顧客組群，否則一般來講喺辦公室裏面就如聯合國，乜嘢人都有。

小弟工作嘅公司係外資公司，總部位於東北亞（唔係某大國），如果你以為公司裏面大部份都係亞洲人，咁你就唔啱喇。公司已經喺澳洲屹立了接近半個世紀，一早溝到淡哂，唔會淨係得同一個族裔嘅同事。我始終係做人事嘅，可以睇到大家Profile，當然能夠知道同事們嘅祖籍。我哋喺呢度當然會有香港人（我自己咪係囉）、第二代華僑、中國人、台灣人、馬來西亞、印度、埃及、巴基斯坦、巴西、英國、蘇格蘭、意大利、法國、越南、柬埔寨、新西蘭、伊朗、約旦、黎巴嫩、南非、毛里裘斯、馬達加斯加、菲律賓⋯⋯ 咁仲唔係聯合國？

由於有咁多唔同嘅種族，喺公司講嘢嘅時候當然要非常留意。甚至乎喺Organized唔同嘅活動，都需要留意所預備嘅食物，以及飲品，有沒有切合不同文化嘅需要。例如喺公司搞Company lunch，你就要預備唔同嘅食品，因為可能有人因為宗教嘅理由唔食某啲嘅肉類、亦都有啲同事可能係素食主義。 你可能話使唔使咁煩呀，我話俾你知，作為人事部，呢啲係喺澳洲處理多元文化同事需要注意嘅基本，已經冇提到喺性別、宗教形式上需要留意嘅地方，因為喺現今澳洲社會，受不同嘅法例規管，對於企業每一日嘅日常運作，喺人與人之間嘅關係有機會地雷處處，稍一不慎，預正個鍾意捉住你黎咬嘅，就真係喊都無謂。

一個只係得百多人嘅企業，辦公室已經有咁多不同嘅族裔一齊工作，真係好多機會比到我哋去了解唔同國家嘅文化歷史。所以有陣時傾開計嘅時候，都會同佢哋分享返喺香港近幾年所發生嘅事，讓他們了解，香港與中國大陸嘅分別，以及中國大陸係如何將香港扭曲成為今日這個令人嘆息唏噓嘅樣子。

說好真實嘅香港故事，就是這樣。

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

The post 【人事世界】文化大匯集 appeared first on 棱角媒體.