睇開我嘅blog嘅人，都知道我一個禮拜有兩日都會同大家分享有關人事嘅事情。其他嗰幾日呢，就同大家去分享唔同嘅topic。當然，我都好多文章係涉及同一啲政制有關嘅，而HR同政制好似互不相干。其實係咪真係咁呢？近日喺一啲同行當中聽到嘅故事，話俾我哋知，政治，其實，離HR都好近。

我哋唔係講到當時分藍黃請唔請邊個啲咁幼稚嘅問題，而係去到有啲位，好多時候係躺着也中槍。話說朋友公司係台資，公司裏便多元文化當然就有啲係從中國大陸嚟嘅同事啦。呢啲同事喺工作上頗有能力，上司於是乎就想將佢哋派去台灣總部受培訓。問題嚟喇，呢幾個朋友仔係攞住中國護照，要攞到台灣嘅Visa相對冇咁容易。部門主管由於係西方人，平時又冇乜留意政治新聞，以為單聲就可以派佢哋去No problem，朋友於是乎溫馨提示，老細即刻皺晒眉頭，原來政治會自己嚟搵你。

有一次就係台灣國慶酒會，為咗湊夠人數，老闆又向呢啲識講普通話嘅同事們作出邀請，其中同事已經同佢講，「你咪玩我擺我上枱啦，我仲要返中國探親」，老細又拗晒頭，以為佢唔肯去，跟住佢話，好敏感㗎，一陣間發現我走去呢啲台灣嘅酒會，返到中國大陸分分鐘俾人照肺。

另外有一次係見工，咁就關我自己事，有一間專做新能源（太陽能板）嘅上海公司打嚟叫我見工，好奇傾兩句，然後問佢而家嘅中美關係咁緊張，佢哋點樣應付萬一嚟到嘅制裁，嗰邊個HR 支吾以對之後，就當然冇下文啦。

大家睇到啦，有時候根本唔係因為你同我政見唔同，所以我唔請你咁簡單，就算我真係請咗你大融合都好，去到某啲嘅時間同環境，世界嘅政治取態，對企業裏便同事嘅選擇，都會作出一定程度嘅影響。

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

支持我們：https://www.ls1.points-media.com/supports/

The post 【人事世界】政職分家可行嗎？ – Sydney HR的日與夜 appeared first on 棱角媒體.